VOLTOU A NEVE

No domingo de resurección a neve asómase polas montañas que rodean o val da Abeleda, incluso pola noite anterior se deixou caer na mesma Abeleda. É a primeira vez neste ano que estas cumes aparecen tinguidas do manto branco que tanto lle gusta á xente, e sobre todo aos máis pequenos. No momento da foto non puiden sacar o Castro, xa que a néboa impedíamo. Foi unha nevada pasaxeira, ao mediodía xa non quedaba nin un só copo de neve no chan. Esperemos que non sexa a única nevarada do ano, xa que estes fenómenos son os que verdadeiramente sacian os mananciais de auga, que nestas datas aínda están algo escasos.

NOVOS USOS

O antes servíalles aos nosos antepasados para o traballo diario, agora estámolo utilizando para decorar os nosos xardíns. O carro que antes levaba leña, herba e monte agora descansa reacondicionado nos nosos xardíns, mirando pasar o tempo e sen moverse nin tan só un metro.

Este exemplo da foto, descansa na aira da Adega do Algueira en Doade.

UNHA IMAXE DO TEMPO

Recordos que nos quedan nas nosas aldeas, pobos, vilas. Raro é a aldea en Galicia onde non queden recunchos como iste. Casas que sobreviven ao tempo sen que ninguén as coide, loitando contra a humidade, o frío, as termitas, e ata pequenos sismos. Un exemplo máis dos "grandes" arquitectos que eran os nosos antepasados. Esta imaxe, corresponde o barrio de (O Outeiro) na Abeleda.

OUTRO EXEMPLO DE ABANDONO.

Esta foto é outro exemplo do abandono que sofren as construcións nas que anda o clero metido por medio. Concretamente esta casa é a Abadía de Abeleda, casa onde fai anos vivía o párroco do pobo. Está rodeada de lameiros e viñas que pertencen a ela. No seu día o obispado de Ourense quixo vendela, pero o pobo opúxose xa que tiñan un proxecto moito máis esperanzador e pertencíalle máis da metade. Pretendíase contruír o Instituto da mocidade, e ofrecela como albergue, con instalacións deportivas. Pero debido á oposición do clero, o proxecto non puido seguir adiante. O que seguiu adiante foi o seu abandono e ano tras ano converteuse no agora vedes. Da casa só quedan as paredes exteriores e algo de tellado, do resto todo é cascallos e maleza.

Destes exemplos temos centos por esta zona.

Estase a perder unha gran parte do noso patrimonio rural, un rural donde nacemos a maior parte dos galegos. Esperemos que os que lles correponda, desperten dunha vez e boten unha mán ao noso pasado.

NATUREZA CALDELÁ

O domingo estiven vendo as obras da nova minicentral da Electrica de Castro Caldelas, e botando unha ollada ao río descubrín esta fermosa fervenza. A pesar da pouca auga que leva o río Edo nestas datas, pódese observar unha caída de auga bastante fermosa, a de aproximadamente catro metros. Recunchos coma este deben ter un oco nas nosas retinas.

Seguro que ao longo de todo o seu percorrido o EDO agochanos moitos máis recunchos fermosos.

Habrá que descubrilos.

O ESPELLO DO SIL

Sorprendeume a tranquilidade das augas. Estabamos coa barca no Sil a altura dos "Váles", onde facía tempo estiveron agachados os membros da guerrilla do Mario. Apagamos o motor para que acougasen as ondas que facíamos, esperamos a que sen voltasen a tranquilizar. A imaxe era espectacular. Decidín sacar a cámara e fotografiar ese momento. O resultado é esta foto. Unha posta de sol do máis fermoso.

"DERROCHE" DE SON.

O cuarteto de musica rock ourensán "Derroche", estase a facer un oco entre os grupos destacados da provincia. Están apostando forte e estalles a sair moi ben. Dous dos seus integrantes, o Cantate e guitarrista "Borja" e "Manuel" o outro guitarrista, son de Abeleda, aínda que actualmente viven en Ourense e Trives respectivamente. No último verán xa actuáron nas Festas de Santa Tegra, en Abeleda, e nas festas do barrio da Ponte, en Ourense entre outras moitas actuacións. A foto corresponde o concerto nas "Festas da Luz" en Santa Tegra. Dende aquí o meu máis sincero parabén e moita sorte no voso longo camiñar.